Studentët e Universitetit të Tetovës, Universitetit “Nënë Tereza” dhe Universitetit të Evropës Juglindore kanë nisur një protestë në Shkup, duke kërkuar respektimin e të drejtave të tyre gjuhësore.
Protesta filloi në hyrje të Ura e Gurit dhe pritet të vazhdojë deri para Ministrisë së Drejtësisë. Studentët kanë deklaruar se po përballen me padrejtësi të vazhdueshme, pasi nuk u lejohet dhënia e provimit të jurisprudencës në gjuhën shqipe, një të drejtë e garantuar si nga Kushtetuta, ashtu edhe nga ligji në fuqi.
Gjatë protestës, studentët mbajnë pankarta me mesazhe të ndryshme, përfshirë: “Ligji për gjuhët është i qartë”, “Stop diskriminimit institucional”, “Respekto ligjin për gjuhën, respekto Kushtetutën” dhe “Mos mohoni një të drejtë të fituar”. Ata kanë bërë thirrje për mbështetje nga të gjithë qytetarët, institucionet dhe aktorët shoqërorë për protestën e tyre paqësore.
Çështja ka tërhequr vëmendje të shtuar në javët e fundit, pasi 385 studentë shqiptarë nga tre universitetet përkatëse kanë firmosur një peticion, duke kërkuar që provimi i jurisprudencës të mbahet edhe në gjuhën shqipe, në përputhje me të drejtat e tyre ligjore.
