Shtetet e Bashkuara të Amerikës kanë vendosur të pezullojnë për një kohë të pacaktuar dialogun strategjik me Kosovën, duke shprehur shqetësim të thellë për veprimet e Qeverisë në detyrë të udhëhequr nga Albin Kurti.
Lajmi u konfirmua zyrtarisht nga Ambasada Amerikane në Prishtinë përmes një njoftimi në Facebook, ku u shpreh zhgënjimi i Uashingtonit për situatën aktuale.
“Veprimet e Qeverisë në detyrë kanë rritur tensionet dhe paqëndrueshmërinë, duke kufizuar kapacitetin e SHBA-ve për të bashkëpunuar në mënyrë efektive me Kosovën mbi prioritetet tona të përbashkëta,” thuhet në deklaratë.
Ky vendim konsiderohet një sinjal i fortë diplomatik, që pasqyron mosmarrëveshjet në rritje mes SHBA-ve dhe Qeverisë Kurti në lidhje me menaxhimin e çështjeve të brendshme dhe dialogun me Serbinë.
Dialogu strategjik Kosovë–SHBA përfshin bashkëpunim në sektorë kyç si siguria, drejtësia, energjia, investimet dhe sundimi i ligjit. Pezullimi i tij përbën një nga masat më të ashpra të Uashingtonit ndaj Prishtinës në vitet e fundit.
