Drejtoria e Policisë Kufitare të Serbisë ka njoftuar se hyrjet dhe daljet për automjetet e rënda janë aktualisht të bllokuara në 20 pika kufitare me vendet e Bashkimit Evropian dhe rajonit.
Sipas njoftimit zyrtar, janë të bllokuara pikat kufitare me Kroacinë: Batrovci, Shid, Bogojevo, Baçka Pallanka, Bezdan dhe Neshtin; me Hungarinë: Horgosh, Kelebia dhe Baçki Breg; me Rumaninë: Gjerdap, Sërpska Cërnja, Vatin dhe Kalugjerovo; me Bullgarinë: Vërshka Quka, Gradina, Strezimirovci, Ribarci dhe Mokranje; si dhe me Maqedoninë e Veriut: Preshevë dhe Prohor Pçinski.
Bllokimi i pikave kufitare me vendet e Bashkimit Evropian ka nisur më 26 janar, si pasojë e protestave të shoferëve të kamionëve nga Serbia, Bosnja dhe Hercegovina, Mali i Zi dhe Maqedonia e Veriut. Shoferët kundërshtojnë procedurat e ashpërsuara për hyrje në Zonën Schengen, të cilat, sipas tyre, kanë shkurtuar ndjeshëm kohën e lejuar të qëndrimit në vendet e BE-së.
Ndërkohë, Forumi i Investimeve i Dhomave të Tregtisë së Gjashtëshes së Ballkanit Perëndimor, që përfshin dhomat ekonomike të Shqipërisë, Bosnjë e Hercegovinës, Kosovës, Maqedonisë së Veriut, Malit të Zi dhe Serbisë, i ka dërguar më 26 janar një thirrje të përbashkët Komisionit Evropian, duke kërkuar gjetjen e një zgjidhjeje urgjente për problemet me të cilat po përballen shoferët e transportit ndërkombëtar.
