Nga sot, marrëveshja për lëvizjen e lirë mes Kosovës dhe Shqipërisë pezullohet përkohësisht. Prej datës 1 tetor deri në fillim të nëntorit, kalimi pa kontrolle kufitare në pikën Vërmicë–Morinë do të ndërpritet.
Gjatë kësaj periudhe, autoritetet kufitare të të dyja vendeve do të rikthejnë përpunimin e të dhënave të udhëtarëve dhe drejtuesve të automjeteve, por përmes një procedure të përshpejtuar, me qëllim të shmangies së pritjeve të gjata dhe radhëve, sidomos për shkak të fluksit të lartë në këtë segment.
Megjithatë, në fundjavë dhe gjatë festave zyrtare, qytetarët që udhëtojnë me automjete me targa të Kosovës apo Shqipërisë do të vazhdojnë të kalojnë kufirin pa iu nënshtruar kontrolleve.
Kjo marrëveshje, e menduar për të lehtësuar qarkullimin dhe për të reduktuar trafikun, ka qenë veçanërisht efikase gjatë sezonit turistik veror, kur numri i lëvizjeve arrin kulmin. Periudha e aplikimit të saj zakonisht shtrihet nga 1 maji deri më 30 shtator.
Në total, për 9 muaj të vitit, qytetarët e të dy vendeve gëzojnë një regjim të lehtësuar kalimi, ndërsa për 3 muaj, si ky aktuali, zbatohen kontrolle standarde në kufi.
