Pas përfundimit të procesit zgjedhor dhe mbylljes së qendrave të votimit në Republikën e Maqedonisë së Veriut, koalicioni shqiptar VLEN ka dalë me një konferencë për media, ku ka deklaruar se pret fitore të thellë në shumicën e komunave me shumicë shqiptare, madje që në raundin e parë të zgjedhjeve lokale. Përfaqësuesit e VLEN theksuan se bazuar në rezultatet e para nga terreni dhe raportimet e komisioneve zgjedhore, ata janë në avantazh të dukshëm në disa prej komunave kryesore të vendit.
“Presim fitore pothuajse në secilën komunë. Jemi optimistë se në disa prej komunave gara do të mbyllet që në rrethin e parë. Kjo mendon se vlen për komunën e Çairit, jemi afër fitores edhe në komunën e Tetovës në raundin e parë, gjithashtu të njëjtën e presim në komunën e Sarajit, në komunën e Bogovinës, Zhelinës dhe Tearcës. Jemi në proces të grumbullimit të informatave,” deklaroi zëdhënësi i koalicionit VLEN gjatë konferencës.
Sipas burimeve nga shtabet zgjedhore, rezultatet paraprake tregojnë një epërsi të konsiderueshme të kandidatëve të VLEN në komunat e përmendura, duke sinjalizuar një konsolidim të mbështetjes për koalicionin shqiptar që është pjesë e Qeverisë aktuale në Shkup. Në disa qytete, veçanërisht në Çair dhe Tetovë, simpatizantët e VLEN kanë nisur tashmë festimet, me fishekzjarrë dhe brohoritje në rrugë pas publikimit të rezultateve të para jozyrtare. Atmosfera festive është vërejtur pranë selive lokale të partive përbërëse të koalicionit, ndërsa pritet që gjatë natës të publikohen edhe të dhënat e tjera zyrtare nga Komisioni Shtetëror i Zgjedhjeve.
Koalicioni VLEN, i cili përfaqëson një bashkim të partive shqiptare që marrin pjesë në Qeveri, e ka cilësuar këtë rezultat si “një fitore të vullnetit qytetar” dhe “një dëshmi të mbështetjes së shqiptarëve për ndryshim, reformë dhe përfaqësim të dinjitetshëm në institucionet e vendit”.
