Këshilli i Qytetit të Sarajevës ka miratuar më 28 janar vendimin që Qyteti i Sarajevës t’i bashkohet zyrtarisht procedurës penale që po zhvillohet para organeve gjyqësore në Milano të Italisë, lidhur me rastin e të ashtuquajturve “turistë snajperistë”, të dyshuar për vrasjen e civilëve gjatë rrethimit të Sarajevës në luftën e viteve 1992–1995.
Hetimet në Itali nisën pas kallëzimit penal të bërë nga shkrimtari dhe gazetari italian Ezio Gavazzeni, i cili pretendon se shtetas të huaj kanë paguar shuma të mëdha parash për të shkuar në pozicionet e Ushtrisë së Republikës Sërpska rreth Sarajevës dhe, kryesisht “për argëtim”, kanë qëlluar me snajper ndaj civilëve në qytetin e rrethuar.
Mediat italiane raportuan për herë të parë në fillim të nëntorit të vitit të kaluar se Prokuroria e Milanos kishte hapur hetime për këtë rast. Gavazzeni, i cili ka refuzuar intervistat për mediat, ka deklaruar në një konferencë për shtyp në Milano se në muajin shkurt pritet të publikojë një libër mbi këtë temë.
Sipas tij, pretendimet e para për praninë e të huajve në vijën e frontit i kishte hasur që në vitin 1995 në një shkrim të gazetës Corriere della Sera, ndërsa interesimi i tij u ringjall në vitin 2022 pas shikimit të dokumentarit “Sarajevo Safari” të regjisorit slloven Miran Zhupaniq.
Prokuroria në Milano pritet të informojë publikun për rezultatet e hetimeve në mars të vitit 2026. Nëse ngrihet aktakuzë dhe vërtetohet fajësia, ky do të ishte rasti i parë në Evropë ku individë do të përgjigjeshin penalisht për vrasjen e civilëve në Sarajevë nga snajperë.
Ndërkohë, autoritetet gjyqësore të Bosnjë e Hercegovinës kanë bërë të ditur se po verifikojnë pretendimet, por deri më tani asnjë snajperist nuk është ndjekur penalisht mbi bazën e përgjegjësisë individuale për vrasjen e civilëve, përfshirë edhe fëmijët.
Sipas të dhënave të shoqatave të viktimave dhe aktgjykimeve të gjykatave ndërkombëtare, gjatë rrethimit gati katërvjeçar të Sarajevës, çdo i dhjeti fëmijë i vrarë në qytet u qëllua nga snajperë, ndërsa mbi 14 mijë fëmijë u plagosën. Tribunali i Hagës ka konstatuar në vendimet e tij se fushata e snajperistëve kishte për qëllim terrorizimin e civilëve të Sarajevës.
