Kreu i Lëvizjes Vetëvendosje, Albin Kurti, paralajmëroi se nëse Kuvendi nuk miraton kandidaturën e Glauk Konjufcës për kryeministër, Kosova mund të shkojë në zgjedhje të reja në dhjetor. Në të kundërt, nëse qeveria Konjufca 1 formohet, zgjedhjet pritet të mbahen në prill, bashkë me zgjedhjen e presidentit të ri.
Presidentja Vjosa Osmani ka mandatua zyrtarisht Konjufcën për formimin e kabinetit, pasi Kurti nuk arriti të sigurojë shumicën parlamentare. Sipas Kushtetutës, Konjufca ka 15 ditë kohë për të prezantuar përbërjen e qeverisë dhe për të marrë mbështetjen e të paktën 61 deputetëve në Kuvend.
“Opozita e ka në dorë të zgjedh rrugën e mëtejshme, ose Kurti 2.5 drejt zgjedhjeve në dhjetor, ose Konjufca 1 drejt zgjedhjeve në prill. Secila prej tyre, për ne është e pranueshme,” tha Kurti.
Presidentja e Kosovës, Vjosa Osmani, megjithë kundërshtimet e opozitës, mandatoi zyrtarisht Glauk Konjufcën për të formuar qeverinë e re.
Konjufca pason Kurtin, i cili nuk arriti të krijonte mazhorancën parlamentare. Sipas Kushtetutës, ai ka 15 ditë nga marrja e mandatit për t’i prezantuar Kuvendit përbërjen e re të ekzekutivit, që duhet të marrë mbështetjen e të paktën 61 deputetëve për zgjedhjen si kryeministër.
