Mijëra qytetarë janë mbledhur në sheshet kryesore të Prishtinës për të protestuar kundër Gjykatës Speciale. Tubimi është thirrur nga Organizatat e Veteranëve të Luftës së Ushtrisë Çlirimtare të Kosovës, të cilët pretendojnë se kjo gjykatë po tenton të deformojë dhe rishkruajë historinë e luftës së UÇK-së.
Protestës i janë bashkuar edhe figura publike që dikur patën rol në themelimin e kësaj gjykate, duke shtuar peshën simbolike të këtij mobilizimi qytetar.
Nënkryetari i organizatës, Gazmend Syla, deklaroi se janë marrë të gjitha masat që protesta të zhvillohet në mënyrë të qetë dhe dinjitoze, por me pjesëmarrje të gjerë.
Kujtojmë se në gusht të vitit 2015, Kuvendi i Kosovës miratoi ndryshimet kushtetuese që çuan në krijimin e Dhomave të Specializuara, në kohën kur vendi qeverisej nga koalicioni PDK-LDK.
