Në prag të protestës së paralajmëruar për t’u mbajtur në Sheshin “Skënderbeu” në Shkup, e thirrur nga shoqatat e dala nga lufta e Ushtrisë Çlirimtare të Kosovës (UÇK), kryeministri i Maqedonisë së Veriut, Hristijan Mickoski, deklaroi se shteti do të marrë të gjitha masat e nevojshme për të garantuar rendin dhe sigurinë gjatë zhvillimit të saj.
Mickoski theksoi se, pavarësisht se qeveria nuk e mbështet këtë protestë, institucionet shtetërore do të angazhohen maksimalisht për të siguruar që gjithçka të zhvillohet në mënyrë paqësore, pa provokime dhe incidente.
“Qeveria nuk e mbështet dhe nuk kemi ndërmend ta mbështesim. Megjithatë, do të kujdesemi që protesta të kalojë në rendin më të mirë, të mos ketë incidente dhe të mos ndodhë asgjë që nuk duam të ndodhë. Nuk bëhet fjalë për asnjë marrëveshje politike. Si Qeveri, do të bëjmë gjithçka, nga pranimi në kufi e deri te realizimi dhe përfundimi i protestës”, deklaroi Mickoski.
Ai bëri të ditur se për organizimin dhe mbarëvajtjen e kësaj proteste janë informuar edhe partnerët strategjikë të vendit, ndërsa është formuar edhe një shtab krize, i cili do të monitorojë të gjitha aktivitetet 24 orë para dhe 24 orë pas mbajtjes së protestës.
