Prokuroria ka paraqitur të hënën prova të reja materiale në gjykimin për vrasjen e Liridona Ademajt, ku i akuzuari kryesor është bashkëshorti i saj, Naim Murseli.
Si prova kyçe janë shfaqur video-incizime nga mbrëmja e 29 nëntorit 2023, të siguruara nga një lokal në Prishtinë, ku Murseli kishte darkuar për herë të fundit me viktimën dhe dy fëmijët e tyre. Sipas Prokurorisë, në të njëjtin lokal, gjatë gjithë kohës, kishte qëndruar edhe Granit Plava, i akuzuar si ekzekutori i vrasjes.
Prokurorja e rastit, Javorka Perlinçeviq, sqaroi se pamjet tregojnë se Naim Murseli ngrihet nga tavolina me telefon në dorë, afrohet te tavolina ku ndodhej Granit Plava dhe kthehet pas rreth dy minutash, veprim që sipas Prokurorisë përbën sinjalizim për kryerjen e krimit.
Sipas hetimeve, Murseli dhe Plava ishin takuar më herët gjatë ditës, rreth orës 16:30, në fshatin Rakovinë, pranë një pompe benzine. Pamje të tjera tregojnë momentin kur Murseli i afrohet Plavës jashtë lokalit dhe i jep një pije energjike, ndërsa të dy shihen duke biseduar dhe duke u larguar së bashku.
Prokuroria ka paraqitur gjithashtu audio-incizime nga momenti i vrasjes, ku dëgjohen krisma e armës dhe britmat e fëmijëve. Sipas prokurores, pas analizës së incizimeve audio të siguruara edhe nga një automjet i markës “Mercedes-Benz”, është urdhëruar ekspertiza forenzike për ndarjen dhe përpunimin e zërave në prapavijë.
Në seancë janë shfaqur edhe pamje të tjera filmike ku Granit Plava shihet duke u larguar nga vendi i ngjarjes pas kryerjes së vrasjes.
Ndër provat e paraqitura janë edhe fotografi që dokumentojnë lëvizjet e Naim Murselit pas dhënies së dëshmisë në polici. Sipas Prokurorisë, ai shkon në një hotel në Prishtinë, ku takohet me Kushtrim Kokallën dhe Valon Llukën. Fotografitë e siguruara nga hoteli “Sëiss Diamond” tregojnë hyrjen e Murselit dhe Kokallës në hotel, si dhe momentin kur Kokalla kryen një pagesë në recepsion me para në dorë.
Prokuroria theksoi se të gjitha këto prova forcojnë dyshimet për planifikimin dhe bashkëpunimin në vrasjen e Liridona Ademajt.
