Nga të shtënat me armë zjarri që kanë ndodhur sot në qytetin e Kumanovës është plagosur Dr. Zekirija Shaini, zyrtar i Bashkimit Demokratik për Integrim (BDI) dhe bartës i listës së këshilltarëve të koalicionit të Aleancës në komunën e Likovës.
Sipas informacioneve zyrtare të publikuara nga Ministria e Punëve të Brendshme (MPB), incidenti ka ndodhur para ndërtesës së Komunës së Kumanovës. Sipas të dhënave fillestare, dy persona të panjohur kanë shtënë me armë automatike të tipit kallashnikov në drejtim të veturës së Shainit. Si pasojë e të shtënave, ai ka pësuar plagë në këmbë dhe është dërguar menjëherë për ndihmë mjekësore në Spitalin e Qytetit të Kumanovës. Burime nga spitali kanë konfirmuar se i plagosuri ndodhet jashtë rrezikut për jetë.
“Rreth orës 13:54 minuta në Kumanovë, dy persona të panjohur kanë shtënë me armë zjarri në drejtim të veturës së personit Z.Sh., nga fshati Sllupçan, i punësuar në Klinikën e Pulmologjisë. Me ndihmën e parë është dërguar në Spitalin e Qytetit”, thuhet në njoftimin e Sektorit për Punë të Brendshme (SPB) Kumanovë.
Prokuroria Themelore Publike e Kumanovës ka reaguar duke konfirmuar se dy prokurorë publikë janë dërguar në vendngjarje për të mbledhur prova materiale dhe për të ndriçuar rrethanat e plota të rastit.
“Lidhur me incidentin në Kumanovë, dy prokurorë publikë nga Prokuroria Themelore Publike e Kumanovës kanë shkuar në vendngjarje dhe po ndërmarrin veprime hetimore. Indikacionet fillestare nuk tregojnë për motive politike pas incidentit të armatosur, por po verifikohen të gjitha rrethanat për të siguruar sqarim të plotë të ngjarjes”, thuhet në reagimin zyrtar të prokurorisë.
Hetimet janë në zhvillim e sipër, ndërsa autoritetet kanë paralajmëruar se do të ndërmerren të gjitha masat e nevojshme për kapjen e autorëve dhe zbardhjen e plotë të motivit të sulmit.
