Një zyrtar i Bashkimit Evropian është plagosur mbrëmjen e 4 nëntorit në qytetin e Gjakovës. Policia e Kosovës njoftoi se rreth orës 19:57, shtetasi i huaj kishte kërkuar ndihmë mjekësore pas plagosjes me një mjet të mprehtë. Ai u trajtua fillimisht në QKMF-në e Gjakovës dhe më pas u transferua për mjekim të specializuar në QKUK, në Prishtinë.
Rasti është marrë në trajtim nga Prokuroria Speciale e Kosovës, e cila në bashkëpunim me Policinë ka nisur të gjitha veprimet hetimore për zbardhjen e plotë të ngjarjes. Zëdhënësja e Prokurorisë, Arbnora Luta, konfirmoi për KosovaPress se hetimet po zhvillohen në përputhje me Kodin e Procedurës Penale, ndërsa për shkak të fazës fillestare të hetimit nuk mund të jepen detaje të tjera.
“Prokuroria Speciale është duke ndërmarrë të gjitha masat e nevojshme hetimore në koordinim me njësitë relevante të Policisë së Kosovës, me qëllim të zbardhjes së plotë të gjendjes faktike. Duke qenë se rasti është ende në fazën fillestare, nuk mund të ndajmë më shumë informacione në këtë moment”, deklaroi Luta.
Ngjarja është konfirmuar edhe nga Zyra e Bashkimit Evropian në Prishtinë, e cila reagoi duke shprehur tronditje për incidentin dhe se hetimi për rastin po vijon.
“Jemi të tronditur nga kjo ngjarje dhe i urojmë stafit të përfshirë rikuperim të shpejtë dhe të plotë. Një hetim është në zhvillim dhe autoritetet po përcaktojnë faktet. Meqenëse hetimi është aktiv, nuk mund të japim më shumë detaje në këtë moment,” thuhet në reagimin e Zyrës së BE-së.
Sipas raportit 24-orësh të Policisë së Kosovës, personi i plagosur kishte dy plagë të shkaktuara nga një mjet i mprehtë.
