Kryeministri në detyrë i Republikës së Kosovës dhe njëherësh kryetar i Lëvizjes Vetëvendosje, Albin Kurti, ka bërë të ditur se pas konstituimit të Kuvendit të Kosovës, partia e tij, si fituese e zgjedhjeve të fundit parlamentare, do t’i drejtohet Presidencës së vendit me emrin e mandatarit për formimin e Qeverisë së re. Njoftimi është bërë gjatë takimit që Kurti ka zhvilluar me kryetarin e Kuvendit të Kosovës, Dimal Basha, pas përmbylljes së procesit të konstituimit të organit ligjvënës.
“Kryeministri në detyrë i Kosovës, Albin Kurti më njoftoi se, si kryetar i partisë më të madhe në vend, kryetarja e Këshillit të Përgjithshëm të Lëvizjes Vetëvendosje si subjekt fitues i zgjedhjeve, Arbërie Nagavci, do ta dërgojë emrin e mandatarit për formimin e Qeverisë te presidentja e vendit, sipas procedurës ligjore”, ka shkruar kryetari i Kuvendit, Dimal Basha, në një postim në Facebook.
Megjithatë, ende nuk është bërë e ditur se kur saktësisht do të dërgohet emri i mandatarit te presidentja e Kosovës, Vjosa Osmani.
Gjatë mbledhjes së Këshillit të Përgjithshëm të Lëvizjes Vetëvendosje, të mbajtur më 7 shtator, kjo parti e ka propozuar Albin Kurtin për një mandat të ri në krye të Qeverisë së Kosovës.
Basha ka bërë të ditur se gjatë takimit me Kurtin është biseduar gjithashtu për “rëndësinë e koordinimit ndërinstitucional” dhe për realizimin e agjendës legjislative të kësaj legjislature.
Kuvendi i Kosovës përmbylli sot seancën konstituive – e cila kishte nisur më 15 prill – pasi deputetët zgjodhën Nenad Rashiqin në postin e nënkryetarit të Kuvendit nga radhët e komunitetit serb.
