Parlamenti i Serbisë ka miratuar sot një ligj që autorizon shembjen e ndërtesës historike të Shtabit të Përgjithshëm të Ushtrisë, e cila u bombardua nga forcat e NATO-s në vitin 1999. Vendimi, që vjen pas një debati të ashpër politik dhe publik, i hap rrugën ndërtimit të një kompleksi luksoz me markën Trump, projekt që do të drejtohet nga Jared Kushner, dhëndri i ish-Presidentit amerikan Donald Trump.
Ligji i miratuar revokon statusin e mbrojtjes së trashëgimisë kulturore për ndërtesën, duke mundësuar që ajo të shembet dhe të zëvendësohet me një hotel dhe rezidenca luksoze me vlerë rreth 500 milionë dollarë. Projekti, që ishte pezulluar më parë për shkak të akuzave për mashtrim ndaj disa zyrtarëve shtetërorë, është riaktivizuar këtë javë pas ndërhyrjes së drejtpërdrejtë të partisë në pushtet të Presidentit Aleksandar Vuçiç.
Ligjvënësi Milenko Jovanov, i cili propozoi nismën, deklaroi në Kuvend se ky projekt do të “ringjallë ndërtesat e shkatërruara nga bombardimet” dhe do t’i japë Beogradit një pamje moderne që tërheq investime të huaja.
“Ne po hapim hapësirë dhe po krijojmë mundësi që vendi të ecë përpara,” tha Jovanov. “Ky është qëllimi dhe detyra jonë kryesore.”
Sipas tij, investimi i Kushner dhe familjes Trump mund të përmirësojë marrëdhëniet midis Beogradit dhe Uashingtonit, në një kohë kur Serbia përpiqet të ruajë ekuilibrin diplomatik mes Moskës dhe Perëndimit.
Megjithatë, nisma ka ngjallur pakënaqësi të thella në opinionin publik. Studentë, historianë, ekspertë të trashëgimisë kulturore dhe figura të opozitës e kanë dënuar vendimin, duke e cilësuar si një akt që fshin një pjesë të rëndësishme të kujtesës kombëtare.
Deputetja opozitare Marinika Tepić reagoi ashpër gjatë debatit parlamentar:
"Kjo ndërtesë është një simbol i rezistencës dhe dëshmi se një komb që është shkatërruar mund të ngrihet përsëri. Sot, ju doni ta ktheni atë simbol në një kompleks luksoz vetëm për t’i pëlqyer Donald Trumpit. Në një vend ku dikur binin bomba, tani planifikoni të derdhni shampanjë.”
Komisioni Evropian ka reaguar gjithashtu me shqetësim ndaj këtij zhvillimi, duke theksuar se ky vendim tregon për dobësimin e sundimit të ligjit dhe demokracisë në Serbi, vend që ka më shumë se një dekadë që përpiqet të anëtarësohet në Bashkimin Evropian.
Pavarësisht kritikave, miratimi i ligjit ishte pothuajse i sigurt, pasi Partia Progresive Serbe e Vuçiçit dhe aleatët e saj gëzojnë shumicën parlamentare. Zyrtarët qeveritarë kanë konfirmuar se ligji do të hyjë në fuqi të shtunën, duke i hapur rrugën fillimit të punimeve për projektin Trump–Kushner.
Ndërtesa e Shtabit të Përgjithshëm, e ndërtuar në vitet 1960 dhe e konsideruar si një vepër e rëndësishme e arkitekturës moderniste pas Luftës së Dytë Botërore, ishte shkatërruar gjatë bombardimeve të NATO-s në vitin 1999, si ndëshkim për agresionin ushtarak të Serbisë ndaj shqiptarëve etnikë në Kosovë.
