Presidentja e Kosovës, Vjosa Osmani, ka deklaruar sot se askush nuk mund ta ketë të drejtën e vetos për konstituimin e Kuvendit, as Lista Serbe e cila po kërkon të bllokojë ngritjen e institucioneve në vend për shkak të moszgjedhjes së një nënkryetari.
Kjo deklaratë erdhi pas kërkesës së Listës Serbe drejtuar Gjykatës Kushtetuese, ku subjekti politik i Beogradit pretendon se konstituimi i Kuvendit është jokushtetues përderisa ende nuk është zgjedhur nënkryetari i pestë, që i takon komunitetit serb në Kosovë.
Osmani ka publikuar sot komentet e saj të dorëzuara në Gjykatën Kushtetuese, duke argumentuar se Kuvendi nuk mund të bllokohet për një çështje të tillë. Sipas saj, një bllokim i tillë do të krijonte precedent të rrezikshëm që në të ardhmen mund të përdoret për të penguar funksionimin e institucioneve të vendit në situata të tjera.
“Askush nuk mund ta ketë të drejtën e vetos për konstituimin e Kuvendit, as Lista Serbe. Kuvendi duhet të funksionojë dhe Kosova nuk mund të lejojë bllokime artificiale të institucioneve”, është shprehur presidentja.
Çështja e ngritjes së institucioneve ka shkaktuar tensione të mëdha politike. Prej disa ditësh, nga radhët e Lëvizjes Vetëvendosje, të drejtuar nga kryeministri në largim Albin Kurti, është nisur një sulm i ashpër ndaj Gjykatës Kushtetuese. VV e ka akuzuar institucionin e drejtësisë se po bllokon ngritjen e qeverisë së re dhe madje e ka paralajmëruar se veprimet e pamatura të saj mund të konsiderohen si “tradhti kombëtare”.
Reagimet nuk kanë munguar as nga faktori ndërkombëtar. Bashkimi Evropian u ka bërë thirrje politikanëve në Kosovë që të përmbahen nga çdo tendencë për ndërhyrje në gjyqësor, duke nënvizuar rëndësinë e pavarësisë së institucioneve të drejtësisë.
Edhe vetë Gjykata Kushtetuese ka dalë me një reagim, ku ka shprehur shqetësimin e saj për “deklarimet e pamatura të zyrtarëve të lartë shtetëror dhe të zgjedhurve politikë”.
Ndërkohë, Gjykata Kushtetuese ka vendosur që deri më 30 shtator t’i ndalohet Kuvendit çdo veprim që mund të çojë në formimin e qeverisë së re. Ky vendim praktikisht e shtyn procesin politik, duke bërë që çdo skenar për formimin e ekzekutivit të ri të merret në konsideratë vetëm pas përfundimit të zgjedhjeve lokale.
