Më 5 shtator 2025, në kinematë e Turqisë do të shfaqet premiera e filmit “Në Errësirën e Diellit – Kosova”. Pas premierës, filmi do të prezantohet edhe në Kosovë dhe vende të tjera të Ballkanit.
Ky prodhim turk trajton një nga ngjarjet më të rënda dhe të ndjeshme të viteve të fundit në Kosovë – sulmin terrorist në Banjskë, të kryer nga grupe paramilitare serbe në shtator të vitit 2023.
Filmi është vazhdim i “Fytyra të Fshehura – Bosnja”, që sillte historinë e fshehjes së kriminelëve të luftës në Bosnjë e Hercegovinë. Këtë herë, rrëfimi zhvendoset në Kosovë, duke fokusuar përpjekjet për të shmangur një konflikt të madh në Ballkan pas sulmit në Banjskë.
Me regji të Haktan Özkan dhe prodhim nga Çiçek Yapım, filmi pasqyron bashkëpunimin strategjik mes Kosovës dhe Turqisë përballë kërcënimeve të sigurisë. Në rolet kryesore janë aktorët Gökhan Tunalıgil (me origjinë nga Kosova), Ayhan Krüezi dhe Ebru Taşçı, së bashku me emra të njohur si Ümit Acar, Müge Ulusoy, Bora Sivri, Ali Düşenkalkar, Ayhan Işık dhe artistja kosovare Sonay Buş.
Xhirimet janë realizuar në Prizren, Prishtinë, Mamushë dhe Bursa.
