Ka përfunduar protesta e studentëve shqiptarë në Shkup, ku mijëra të rinj u mblodhën për të kërkuar përdorimin e gjuhës shqipe në provimin e jurisprudencës në Maqedoninë e Veriut. Protestës iu bashkuan edhe studentë nga Kosova dhe Shqipëria.
Gjatë marshimit në kryeqytetin e Maqedonisë së Veriut, protestuesit kërkuan dorëheqjen e kryeministrit Hristijan Mickoski dhe ministrit të Drejtësisë, Igor Filkov. Ata shpalosën thirrje kombëtare si “O sa mirë me qenë shqiptar” dhe “Gjuha shqipe amanet”, ndërsa gjatë marshimit kënduan edhe Himnin Kombëtar.
Pas përfundimit të protestës, sipas deklarimeve të bëra para qytetarëve dhe studentëve të mbledhur para Ministrisë së Drejtësisë në Shkup, janë arrestuar pesë studentë.
“Po dalim me protestu në mënyrë paqësore, provokohemi rrugës. Të dashur policë, edhe neve duhet të na mbroni”, deklaroi një student para turmës.
Studentët shqiptarë kërkojnë që provimi i jurisprudencës të mundësohet edhe në gjuhën shqipe, duke e cilësuar këtë si një të drejtë themelore.
