Ish-presidenti i Maqedonisë se Veriut, Stevo Pendarovski, ka paralajmëruar për një situatë të ndjeshme lidhur me ligjin për përdorimin e gjuhëve, duke theksuar se një iniciativë e dorëzuar në Gjykata Kushtetuese e Maqedonisë së Veriut kërkon shfuqizimin e ligjit që rregullon përdorimin e gjuhës shqipe. Në një intervistë, ai tha se gjuha shqipe ka status zyrtar për shkak të përqindjes së konsiderueshme të shqiptarëve që jetojnë në vend, ndërsa përdorimi i saj është rregulluar me ligj dhe është përmirësuar disa herë ndër vite.
“Është zyrtare për shkak të 20 për qind të njerëzve që jetojnë në këtë vend. Ndërkohë ne kemi pranuar dy gjuhë juridike. Ligji për gjuhët është ndryshuar disa herë për të përmirësuar të drejtat e shqiptarëve”, deklaroi Pendarovski.
Ai bëri të ditur se një qytetar ka paraqitur një mocion në Gjykata Kushtetuese e Maqedonisë së Veriut duke pretenduar se ligji për përdorimin e gjuhëve, përfshirë gjuhën shqipe, nuk është në përputhje me Kushtetutën dhe ka kërkuar shfuqizimin e tij.
“Dikush, supozohet një qytetar i thjeshtë dhe i panjohur për publikun, ka paraqitur një mocion para Gjykatës Kushtetuese duke thënë se ligji për gjuhën shqipe nuk është në përputhje me Kushtetutën dhe ka kërkuar asgjësimin e këtij ligji. Gjykata tashmë ka planifikuar një seancë për këtë çështje dhe do të jetë problem i madh nëse vendoset shfuqizimi i ligjit”, tha ai.
Sipas tij, një nga sfidat kryesore mbetet zbatimi praktik i ligjit në institucione, veçanërisht në administratë dhe në sistemin gjyqësor.
“Shqiptarët mund ta përdorin këtë gjuhë, por në shumë raste nuk e shohim zbatimin e plotë në institucione dhe gjykata. Një nivel është ai që është vendosur në ligj, por një tjetër është përdorimi real në jetën e përditshme”, u shpreh Pendarovski.
Ai shtoi se nëse ligji mbetet vetëm si deklarim politik dhe nuk zbatohet në praktikë, atëherë rrezikohet që të sfidohet edhe më tej nga kundërshtarët e tij.
