Propozimi i Albin Kurtit për një mandat të ri katërvjecar nuk mori përkrahjen e nevojshme prej 61 votash në Kuvendin e Kosovës.
Kështu, me 56 vota pro, 52 kundër dhe 4 absentime, Kuvendi nuk e zgjodhi Qeverinë e re të Republikës së Kosovës.
Kuvendi i Kosovës është mbledhur sot në një seancë të jashtëzakonshme me pikën e vetme të rendit të ditës: zgjedhjen e qeverisë së re. Kryeministri në detyrë, Albin Kurti, paraqiti para deputetëve përbërjen e kabinetit të ri qeveritar dhe kërkoi votëbesimin për formimin e ekzekutivit, që kërkon të paktën 61 vota.
Në fjalën e tij para Kuvendit, Kurti theksoi se vendi ndodhet në një situatë të vështirë politike për shkak të moskonstituimit të Kuvendit dhe mungesës së gatishmërisë së partive për të marrë përgjegjësinë që, sipas tij, u është deleguar nga qytetarët.
“Si pasojë e mosgatishmërisë që të marrin përgjegjësinë që ua ka deleguar qytetari me votë, sot ndodhemi para një situate ku qeveria propozohet si votim. Ky votim nuk është thjesht formalitet politik, por përgjegjësi shtetërore. Pa votimin e qeverisë së re, republika rrezikon të shkojë në zgjedhje të reja,” tha Kurti.
Gjatë fjalës së tij, Kurti foli edhe për sfidat e sigurisë me të cilat është përballur Kosova në muajt e fundit, duke kujtuar sulmet terroriste të dirigjuara, sipas tij, nga Serbia. Ai përmendi sulmin në Banjskë, ku u vra polici Afrim Bunjaku, si dhe incidentin në lumin Ibër.
“Kryekrimineli Milan Radoiçiq është shpallur në kërkim dhe ndaj tij e 44 shokëve terroristë është ngritur një aktakuzë prej 160 faqesh,” deklaroi Kurti.
Kryeministri në detyrë theksoi gjithashtu se pavarësisht ndëshkimeve politike që, sipas tij, Kosova ka marrë nga faktori ndërkombëtar, aleanca me Shtetet e Bashkuara, Bashkimin Evropian dhe NATO-n mbetet e palëkundur.
“Kosova është rreshtuar në hartën gjeopolitike në anën e paqes, drejtësisë dhe aleatëve të saj demokratikë. Aleanca jonë me SHBA, BE, Mbretërinë e Bashkuar dhe NATO-n s’do të lëkundet, sepse nuk është thjesht strategji por vlerë,” tha Kurti, duke shtuar se Kosova “nuk është vetëm pjesë e kontinentit evropian, por pjesë e vlerave të tij”.
Kryetari i Kuvendit, Dimal Basha, tha se tani përgjegjësia kalon sërish te presidentja Vjosa Osmani dhe mbylli punimet e seancës së sotshme.
