Pas publikimit të vendimit të plotë të Gjykatës Kushtetuese në Fletoren Zyrtare, Kuvendi i Kosovës ka njoftuar se vazhdimi i seancës konstituive do të mbahet të mërkurën në orën 11:00.
Në aktgjykimin e saj, Gjykata Kushtetuese urdhëroi që votimi për kryetarin e Kuvendit të bëhet me votim të hapur, ndërsa emri i njëjtë mund të propozohet jo më shumë se tri herë. Po ashtu, Kushtetuesja theksoi se konstituimi i Kuvendit duhet të përfundojë brenda 30 ditësh.
Kryesuesi i seancës, Avni Dehari, është tashmë i detyruar që t’i kërkojë subjektit më të madh parlamentar, Lëvizjes Vetëvendosje, propozimin e një kandidati për kryetar të Kuvendit. Vendimi i Kushtetueses konstatoi se Dehari ka shkelur Kushtetutën kur lejoi votim të fshehtë, përmes të cilit partia e tij synonte të zgjidhte Albulena Haxhiun në këtë post.
Seanca e së mërkurës do të vijojë me pikën 3 dhe 4 të rendit të ditës: zgjedhja e kryetarit të Kuvendit dhe zgjedhja e nënkryetarëve.
Kryeministri në detyrë, Albin Kurti, ka dhënë sinjale se do ta respektojë vendimin e Kushtetueses, por pritshmëritë për një marrëveshje nga opozita mbeten të ulëta. Deputetja e LDK-së, Hykmete Bajrami, ka deklaruar se zgjedhja e kryetarit të Kuvendit varet nga gatishmëria e Vetëvendosjes për të propozuar një kandidat që mund të sigurojë shumicën prej 61 votash. Ajo theksoi se Albulena Haxhiu nuk është njëra prej tyre.
Sipas opozitës, nëse VV vendos sërish ta kandidojë Haxhiun, kjo do të tregojë mungesë reflektimi dhe mungesë vullneti për të konstituar Kuvendin dhe për të zhbllokuar ngërçin politik në vend.
