Kandidati i Lëvizjes Vetëvendosje për kryeministër, Albin Kurti, e ka cilësuar rezultatin e zgjedhjeve të parakohshme si fitore të popullit të Kosovës dhe të Republikës. Në një konferencë për media, Kurti theksoi se verdikti i qytetarëve e bën të qartë domosdoshmërinë për të ecur përpara pa humbur kohë drejt formimit të institucioneve të reja.
Sipas rezultateve preliminare të Komisionit Qendror të Zgjedhjeve, LVV ka marrë 49.74 për qind të votave, pa përfshirë ende votat me kusht, ato të personave me aftësi të kufizuara dhe votat e diasporës.
“Më 9 shkurt fitoi LVV-ja me partnerët, ndërsa më 28 dhjetor 2025 fitoi populli i Kosovës dhe Republika. Është fitorja më e madhe në historinë e vendit. Tani na presin shumë punë përpara dhe rezultati i sotëm e ka bërë të qartë se duhet të ecim përpara pa vonesa. Sa më shpejt të certifikohen rezultatet, aq më shpejt duhet të krijohen institucionet dhe të vazhdojmë me projektet e nevojshme”, u shpreh Kurti.
Ai i bëri thirrje edhe partive të ish-opozitës për bashkëpunim në legjislaturën e dhjetë, veçanërisht për miratimin e marrëveshjeve ndërkombëtare dhe ligjeve që, sipas tij, janë në interes të qytetarëve.
“Ftoj partitë opozitare për bashkëpunim në Kuvend, për marrëveshjet ndërkombëtare, për ligje të mira dhe për interesin publik. Urime të gjithë qytetarëve dhe mërgatës, pa dallim”, shtoi Kurti.
Duke folur për zgjedhjen e presidentit të ardhshëm të vendit, Kurti deklaroi se fillimisht do të zhvillojë bisedime me presidenten aktuale, Vjosa Osmani, mandati i së cilës përfundon në prill të vitit 2026, dhe më pas edhe me partitë e tjera parlamentare. Sipas tij, miratimi i marrëveshjeve ndërkombëtare që kërkojnë votën e 80 deputetëve do të jetë një test kyç për bashkëpunimin mes qeverisë dhe opozitës dhe mund të ndikojë edhe në procesin e zgjedhjes së presidentit.
“Paraprakisht duhet certifikimi i rezultateve, për të pasur një pasqyrë të qartë të përbërjes së legjislaturës së dhjetë. Pastaj vijnë bisedimet për marrëveshjet ndërkombëtare dhe çështjen e presidentit. Këto do të jenë prova reale e bashkëpunimit në katërvjeçarin e ardhshëm”, theksoi Kurti.
