Qytetarët e Kosovës kanë përfunduar sot procesin e votimit në zgjedhjet lokale, teksa në orën 19:00 janë mbyllur të gjitha qendrat e votimit në të gjithë vendin. Pjesëmarrja, sipas të dhënave paraprake të Komisionit Qendror të Zgjedhjeve, ka qenë e kënaqshme dhe procesi është zhvilluar në përgjithësi i qetë.
Menjëherë pas mbylljes së kutive të votimit, mediat e Kosovës kanë publikuar exit poll-et e para, të cilat japin një pasqyrë fillestare të rezultateve në disa nga komunat kryesore të vendit.
Prishtinë – Sipas exit-polleve, në kryeqytet kryeson Përparim Rama nga Lidhja Demokratike e Kosovës (LDK) me 35.82% të votave. Megjithatë, sipas projeksioneve të para, Prishtina pritet të shkojë në balotazh, pasi asnjë kandidat nuk e ka kaluar pragun për fitore në raundin e parë.
Mitrovicë – Sipas rezultateve paraprake, Partia Demokratike e Kosovës (PDK) është në avantazh dhe pritet të ruajë epërsinë në këtë komunë.
Podujevë – Gara është e ngushtë mes kandidatëve të Vetëvendosjes (VV) dhe LDK-së, dhe gjithashtu pritet balotazh.
Pejë dhe Gjilan – Të dyja këto komuna, sipas exit-polleve, pritet të shkojnë në raundin e dytë të zgjedhjeve, për shkak të garave shumë të afërta mes subjekteve kryesore politike.
Procesi i numërimit të votave do të nisë menjëherë pas mbylljes së kutive, ndërsa rezultatet zyrtare pritet të publikohen nga KQZ gjatë orëve në vijim.
