Kryetari i Komisioni Qendror i Zgjedhjeve i Kosovës, Kreshnik Radoniç, ka propozuar datën 7 qershor për mbajtjen e zgjedhjeve të parakohshme parlamentare, pas takimit që zhvilloi me presidenten në detyrë, Albulena Haxhiu.
Radoniç tha se institucioni që ai drejton ka kërkuar sa më shumë kohë për përgatitjen e procesit zgjedhor, duke theksuar se organizimi i zgjedhjeve kërkon përgatitje të konsiderueshme.
“Sa i përket datës, kemi kërkuar që të kemi sa më shumë kohë, na duhen përgatitje sepse nuk është proces i lehtë. I mbetet presidentes. Gjykata Kushtetuese e ka caktu, 31 maji ose 7 qershori. Për ne është 7 qershori, tash i mbetet presidentes me vendosur”, deklaroi ai.
Sipas tij, gjatë takimit nuk është diskutuar ende për buxhetin që do t’i duhet KQZ-së për organizimin e zgjedhjeve, por ai theksoi se shpenzimet pritet të jenë të ngjashme me ato të zgjedhjeve të fundit.
Sipas Radio Evropa e Lirë, zgjedhjet e fundit parlamentare në Kosovë, të mbajtura më 28 dhjetor 2025, i kushtuan buxhetit rreth 7 milionë euro.
