Glauk Konjufca, i propozuar nga Lëvizja Vetëvendosje për postin e Presidentit, ka sqaruar qëndrimin e tij lidhur me mundësinë e tërheqjes nga kandidatura. Ai deklaroi se është i gatshëm të heqë dorë, në rast se opozita propozon një kandidat jopartiak.
Sipas tij, Kryeministri ka vendosur një kornizë të qartë për zgjedhjen e Presidentit, duke theksuar se, nëse arrihet një marrëveshje konsensuale, kandidati nuk duhet të jetë i lidhur drejtpërdrejt me partitë politike apo strukturat e tyre drejtuese.
I pyetur nëse një figurë si kreu i LDK-së, Lumir Abdixhiku, do të ishte i pranueshëm, Konjufca u shpreh se kjo çështje nuk është diskutuar në këtë drejtim.
Ai theksoi se, nëse bëhet fjalë për një kandidat politik, Vetëvendosje tashmë ka paraqitur propozimin e saj, duke shtuar se më herët është konsideruar i përshtatshëm për postin e kryeparlamentarit.
Konjufca nënvizoi se deri më tani nuk është hapur opsioni për një President partiak, por vetëm për një figurë jopartiake. Në këtë rast, ai ritheksoi gatishmërinë për t’u tërhequr nga gara, duke theksuar se nuk dëshiron të pengojë arritjen e një kandidati të përbashkët.
‘Deri tani nuk wshtw hapur ky opsion për president partiak. Deri tash asht hapur për president jo-partiak. Nëse është jopartiak, unë jap dorëheqje prej kandidaturës time. Jap dorëheqje sepse po gjendet një i të gjithëve, kush jam unë me mbyllë rrugën’, është shprehur Konjufca.
