Presidenti i Serbisë, Aleksandër Vuçiç, ka komentuar arrestimin e presidentit të Venezuelës, Nicolas Maduro, pas mbledhjes së Këshillit për Sigurinë Kombëtare, duke deklaruar se rendi ndërkombëtar është në shpërbërje dhe se bota po drejtohet nga ligji i forcës.
Vuçiç theksoi se Serbia ndodhet në një pozicion gjithnjë e më kompleks në Evropën Juglindore, në një kohë kur, sipas tij, rendi i vjetër botëror po shembet dhe rregullat ndërkombëtare nuk zbatohen më.
“Jemi të vetëdijshëm për kompleksitetin e pozicionit që ka vendi ynë në këtë rajon dhe ky kompleksitet do të jetë gjithnjë e më i theksuar, duke pasur parasysh faktin se rendi i vjetër në botë po shembet dhe asnjë rregull nuk zbatohet më. E drejta publike ndërkombëtare praktikisht nuk ekziston, ndërsa rendi i OKB-së ekziston vetëm në letër,” deklaroi Vuçiç.
Ai shtoi se ngjarjet e fundit në Venezuelë tregojnë qartë, sipas tij, se Karta e Kombeve të Bashkuara nuk funksionon më. “Bota po dominohet nga ligji i forcës dhe ligji i më të fortit. Kush është më i fortë, shtyp,” u shpreh presidenti serb.
Në fjalën e tij, Vuçiç u ndal edhe te situata e sigurisë në rajon, duke shprehur shqetësim për armatimin e mëtejshëm të Prishtinës dhe për bashkëpunimin e saj me Kroacinë dhe Shqipërinë.
"Ne jemi të shqetësuar për armatimin e mëtejshëm të Prishtinës, si dhe për aleancën me Kroacinë dhe Shqipërinë. Ata planifikojnë të zhvillojnë sisteme më komplekse dhe Serbia po i ndjek këto zhvillime me vëmendje,” tha ai.
Vuçiç theksoi se Serbia jo vetëm që po monitoron situatën, por po përgatitet edhe për mbrojtjen e saj. “Ne besojmë se forca jonë do të jetë një pengesë e mjaftueshme dhe se do ta arrijmë qëllimin tonë kryesor, që është ruajtja e paqes dhe stabilitetit në Serbi,” përfundoi ai.
