Ish-ambasadori i Holandës në Kosovë, Robert Bosch, ka mbajtur një fjalim të fortë në mbështetje të udhëheqësve të Ushtrisë Çlirimtare të Kosovës, gjatë një tubimi të zhvilluar në Hagë. Në fjalën e tij, Bosch vuri në dyshim seriozitetin e procesit gjyqësor që po zhvillohet ndaj ish-presidentit të Kosovës, Hashim Thaçi, dhe ish-udhëheqësve të tjerë të UÇK-së, duke e cilësuar atë si të padrejtë dhe të ndikuar politikisht.“Ne kemi patur kërkesë dhe presion nga qeveritë tona për krijimin e kësaj gjykate. Ishte e çuditshme që nuk kishte asnjë serb përpara saj. E kam takuar Hashim Thaçin dhe i kam thënë: ‘Ti do të lirohesh për mungesë provash’”, u shpreh Bosch.
Diplomati holandez shtoi se procesi gjyqësor është duke u zvarritur dhe se gjykatësit po përfitojnë nga kjo situatë.
“Gjyqi është joserioz. Gjykatësit ndihen komod këtu në Hagë, me një jetë shumë të mirë, duke marrë paga të larta, ndërkohë që procesi të tejzgjatet. Është e pamendueshme të arrish në konkluzionin se UÇK ishte një organizatë kriminale”, theksoi Bosch.
Fjalimi i ish-ambasadorit të Holandës përfaqëson një nga zërat ndërkombëtarë që kanë vënë në pikëpyetje legjitimitetin e gjykatës speciale dhe procesit ndaj ish-udhëheqësve të UÇK-së, duke shtuar edhe më shumë debat rreth rolit dhe drejtësisë së këtij institucioni në raport me konfliktin e Kosovës.
