Sheshi përpara Parlamentit grek në Athinë u mbush të dielën nga qindra qytetarë dhe dhjetëra shoqata që shprehën mbështetje për Pano Rucin, babain me origjinë shqiptare që humbi djalin e tij Denis në tragjedinë hekurudhore të Tempit.
Prej tetë ditësh, Ruci ndodhet në grevë urie, duke kërkuar zhvarrosjen e trupit të të birit për të zbuluar të vërtetën mbi ngjarjen tragjike ku humbën jetën 57 persona në shkurt të vitit 2023. Në protestë është bashkuar edhe një baba tjetër që humbi fëmijën në të njëjtin aksident.
“Nuk na japin leje për zhvarrim. Nuk na lënë të kërkojmë të vërtetën, të gjejmë provat, të zbulojmë çfarë ndodhi atë natë. Pyes: nga çfarë kanë frikë? Unë do të vazhdoj deri në fund. Nuk ndalem”, u shpreh Pano Ruci, babai i 22-vjeçarit Denis.
Mbi 55 organizata dhe shoqata, mes tyre federata arti, punonjës të teatrit kombëtar, sindikata të mediave e muzikantë, kanë dalë publikisht në Athinë e Selanik në mbështetje të grevistëve të urisë. Ata denoncojnë mbylljen e përshpejtuar të hetimeve dhe kërkojnë ndëshkimin e të gjithë përgjegjësve të tragjedisë.
“Të bashkuar, të gjithë së bashku, nuk ka mënyrë që të na mposhtin. Këtë herë, e mira do të triumfojë”, tha Maria Karystianou, nënë viktime dhe kryetare e komitetit të prindërve të tragjedisë së Tempit.
