Policia e Kosovës bëri të ditur se më 20 tetor, në bashkëpunim me Institutin e Mjekësisë Ligjore dhe Komisionin Qeveritar për Personat e Zhdukur, kanë kryer gërmime në varrezat e fshatit Hajvali, pranë Prishtinës. Gjatë punimeve janë gjetur mbetje eshtërore që dyshohet se i përkasin të paktën tre personave të zhdukur gjatë konfliktit në Kosovë në vitet 1998-1999.
Ky operacion u zhvillua me urdhër të Gjykatës Themelore në Prishtinë. Mbetjet mortore janë dërguar në Institutin e Mjekësisë Ligjore për ekzaminime të mëtejshme, ndërsa punimet për zbulimin e eshtrave do të vazhdojnë edhe në ditët në vijim.
Gjatë luftës së Kosovës, rreth 13,000 persona humbën jetën, ndërsa mbi 1,500 ende vazhdojnë të jenë të zhdukur, shumica e tyre civilë shqiptarë.
Në vitin 2023, Kosova dhe Serbia arritën një marrëveshje për Deklaratën e Përbashkët lidhur me personat e zhdukur, si pjesë e dialogut të ndërmjetësuar nga Bashkimi Evropian për normalizimin e marrëdhënieve. Në këtë marrëveshje u premtua qasje e plotë në informacione dhe dokumente të rëndësishme, si dhe bashkëpunim përmes një komisioni të përbashkët.
