Një video e publikuar paraditen e sotme në Facebook ka nxitur reagime në Kumanovë, ku gjatë një stërvitjeje janë parë pjesëtarë të forcave speciale duke brohoritur në gjuhën maqedonase “Këtu është Maqedoni, le ta dinë të gjithë” dhe “Do të luftojmë për Maqedoninë”.
Në pamje shfaqen efektivë të shoqëruar nga furgonë dhe mjete policie, teksa patrullojnë në zonë gjatë ushtrimit. Sipas raportimeve, stërvitja është zhvilluar në rrugën kryesore të tregut dhe pranë Lagjes së Trimave, zonë me ndjeshmëri të lartë, ndërsa pretendohet se një aktivitet i tillë nuk është zhvilluar më parë jashtë kazermave në qytet. Ngjarja vjen vetëm dy ditë përpara protestës së paralajmëruar më 18 maj nga studentët shqiptarë në Maqedonia e Veriut, të cilët kërkojnë që provimi i jurisprudencës të zhvillohet edhe në gjuhën shqipe.
