Kuvendi i Kosovës nuk arriti të konstituohet as në seancën e sotme konstituive, duke dështuar sërish zgjedhja e kryetarit të këtij institucioni.
Pas publikimit të aktgjykimit të plotë të Gjykatës Kushtetuese, e cila caktoi një afat 30-ditor për konstituimin e Kuvendit, u mbajt votimi për dy kandidatet e propozuara nga Lëvizja Vetëvendosje.
Kandidatja e parë, Albulena Haxhiu, mori 57 vota për, 56 kundër dhe 3 abstenime, rezultat ky që nuk siguroi kuorumin e nevojshëm. E njëjta situatë u përsërit edhe me kandidaten e dytë, Donika Gërvalla, e cila gjithashtu mori 57 vota pro, 56 kundër dhe 3 abstenime.
Pas dështimit të dy tentativave, kryesuesi i Kuvendit, Avni Dehari, shpalli përfundimin e seancës dhe njoftoi se seanca e radhës do të mbahet më 22 gusht, në orën 11:00.
