Kosova votoi sot nga ora 07:00 e mëngjesit deri në orën 19:00, në një proces që u konsiderua i qetë. Sipas Komisionit Qendror të Zgjedhjeve në Kosovë, votuan vetëm 38,87% e qytetarëve, duke shënuar një rënie me rreth 4% keahasuar me zgjedhjet lokale të vitit 2021.
Exit Poll-et e para të publikuara nga mediat e Kosovës flasin për një garë interesante në disa komuna. Surprizues është cilësuar rezultati paraprak në Graçanicë, ku për herë të parë komuna që drejtohej nga komuniteti serb, kryesisht lista serbe, po synon udhëheqjen me Aleancën për shqiptarët. LVV, LDK, PDK, AAK janë bërë bashkë. Kjo situate ka rritur dhe pjesëmarrjen e qytetarëve për të votuar. Kandidati i përbashkët i Aleancës është Leutrim Ajeti i cili aktualisht mban detyrën e nënkryetarit.
Në Prizren dhe në Pejë do të ketë balotazh. Sondazhet e para të publikuara në mediat e Kosovës flasin për një raund të dytë që do të përcaktojë fituesin e komunave në Prizren dhe Pejë. Konkretisht, në Prizren është duke kryesuar Partia Demokratike e Kosovës. Shaqir Totaj (PDK) ka marrë 43.3%, Artan Abrashi (LVV) 30.4%, Driton Selmanaj (LDK) 11.1% dhe Zafir Berisha 4.2%
Sipas rezultateve në Mitrovicë Arian Tahiri i PDK-së ka marrë 55%, Faton Peci i LVV-së ka marrë 39,7% dhe Gëzim Plakolli i LDK-së ka 4,4%.
Prishtina po ndahet mes LDK dhe LVV. Sipas exit-polleve të mediave të Kosovës, më Prishtinë kryeson Përparim Rama nga LDK me 35.82%. Pas tij vjen Hajrulla Çeku nga LVV me 31.57% të votave, që pasohet nga Uran Ismaili i PDK-së me 26.05%. Pas tyre vjen Bekë Berisha i AAK me 4.24%.
