Bashkimi Evropian ka filluar heqjen e disa masave ndëshkuese ndaj Kosovës, të vendosura në vitin 2023, duke liruar fondet për një pjesë të projekteve të bllokuara. Lajmi u bë i ditur nga Zëvendëskryeministri i parë në detyrë i Kosovës, Besnik Bislimi, pas pranimit të një letre zyrtare nga Drejtori i Përgjithshëm për Zgjerim i BE-së, Gert Jan Koopman.
Sipas letrës së publikuar nga Bislimi, BE ka liruar mjetet financiare për katër projekte në kuadër të programeve IPA, në vlerë prej 34.6 milionë eurosh. Ky vendim vjen si rezultat i asaj që Komisioni Evropian e ka vlerësuar si “transferim i duhur i pushtetit lokal në veri”, pas zgjedhjeve lokale të mbajtura më 12 tetor.
“Bazuar në këto zhvillime dhe në përputhje me Komunikimin e Komisionit për Zgjerimin 2025, kam kënaqësinë t’ju informoj se Komisioni do të heqë më tej disa nga masat e BE-së, konkretisht ato që lidhen me programin e fondeve të BE-së dhe kontraktimin e projekteve prioritare”, thuhet në letrën e Koopmanit.
Bislimi e ka mirëpritur këtë hap, duke ritheksuar kërkesën e Kosovës për heqjen e plotë të masave ndëshkuese. “Në vazhdimësi kemi insistuar për heqjen e masave. Nuk ka më asnjë arsye që një pjesë e tyre të mbeten në fuqi, sidomos pas transferimit të pushtetit në katër komunat në veri në mënyrë ligjore dhe të qetë”, deklaroi ai.
Megjithatë, sipas mediave në Prishtinë, Bashkimi Evropian nuk pritet t’i heqë të gjitha masat ndaj Kosovës brenda këtij viti. Komisioni Evropian ka kërkuar që Kosova të paraqesë projektet për shfrytëzimin e fondeve IPA për periudhën 2026–2027, të cilat duhet të miratohen nga Komisioni dhe të mbështeten nga shtetet anëtare.
Të martën, ministrat e vendeve anëtare të BE-së diskutuan në Bruksel për procesin e zgjerimit dhe miratuan konkluzionet përkatëse. Në pjesën për Kosovën, Këshilli për Çështje të Përgjithshme i BE-së bën thirrje për përshpejtimin e reformave dhe zbatimin e marrëveshjeve me Serbinë në kuadër të procesit të normalizimit, përfshirë formimin e Asociacionit të komunave me shumicë serbe. Nga ana tjetër, Serbisë i kërkohet të nisë njohjen e dokumenteve dhe simboleve të Kosovës dhe të ndalë kundërshtimin ndaj anëtarësimit të saj në organizata ndërkombëtare.
