Autoritetet serbe kanë arrestuar ish-pjesëtarin e Ushtrisë Çlirimtare të Kosovës, Avni Qenaj, nga fshati Romajë i Prizrenit. Lajmi u konfirmua nga nënkryetari i Organizatës së Veteranëve të UÇK-së (OVL-UÇK), Gazmend Syla, i cili tha se Qenaj u ndalua gjatë kalimit tranzit në territorin e Serbisë.
Sipas Sylës, Qenaj ishte pjesëtar i brigadës 138 “Agim Ramadani” dhe dyshohet se policia serbe ia gjeti kartelën e veteranit gjatë kontrollit. Ai theksoi se Qenaj kishte udhëtuar disa herë më parë përmes Serbisë pa pasur asnjë problem.
Ministria e Punëve të Brendshme të Serbisë njoftoi se ka arrestuar një person me inicialet A.Q., të dyshuar për “organizim dhe nxitje të kryerjes së gjenocidit dhe krimeve të luftës”. Sipas MPB-së, ai dyshohet se i është bashkuar shtabit lokal të UÇK-së në Prizren në prill të vitit 1998 dhe ka marrë pjesë në betejat e vitit 1999 në Koshare si anëtar i brigadës 138.
Avni Qenajt i është caktuar masa e ndalimit 48-orësh, ndërsa autoritetet serbe kanë paralajmëruar se ndaj tij do të dorëzohet kallëzim penal në prokurori.
Institucionet e Kosovës ende nuk kanë dhënë reagim zyrtar. Radio Evropa e Lirë ka kërkuar përgjigje nga Ministria e Punëve të Jashtme dhe Diasporës.
Arrestime të ngjashme të qytetarëve të Kosovës nga autoritetet serbe janë raportuar edhe më herët, në kuadër të pretendimeve të Beogradit për krime lufte të kryera nga ish-pjesëtarë të UÇK-së. Në korrik të këtij viti u arrestua edhe Lulzim Halili, megjithëse OVL-UÇK deklaroi atëherë se ai nuk figuron në listat e veteranëve apo pjesëmarrësve të betejës së Koshares.
