Të paktën 109 persona janë arrestuar në lidhje me dyshimet për manipulim të votave gjatë zgjedhjeve në komunën e Prizrenit.
Kryeprokurori i Prokurorisë Themelore në Prizren, Petrit Kryeziu, njoftoi se arrestimet lidhen me falsifikim të rezultateve, presion dhe kanosje ndaj votuesve, si dhe dhënie dhe marrje ryshfeti. Ai shtoi se manipulimi nuk do të ishte i mundur pa përfshirjen e komisionerëve të deleguar nga katër partitë kryesore në vend.
“Katër prokurorët e krimeve të rënda janë angazhuar në rast, ku deri më tani janë lëshuar 109 vendime për ndalim. Gjatë hetimeve janë marrë deklarime nga dëshmitarë që tregojnë personat që kanë marrë dhe dhënë ryshfet”, tha Kryeziu.
Hetimet vazhdojnë, ndërsa autoritetet po përpiqen të sqarojnë të gjitha implikimet e mundshme në manipulimin e procesit zgjedhor.
