Dhomat e Specializuara të Kosovës (DhSK) në Hagë kanë vendosur të vazhdojnë masën e paraburgimit për Kadri Veselin, Rexhep Selimin dhe Jakup Krasniqin, të cilët së bashku me Hashim Thaçin po përballen me akuza për krime lufte dhe krime kundër njerëzimit.
Në tri vendime të ndara të publikuara më 18 shtator 2025, Prokuroria ka argumentuar se ekziston rreziku që tre të akuzuarit t’i shmangen drejtësisë, të kryejnë vepra të tjera penale ose të pengojnë procesin gjyqësor.
Trupi gjykues i kryesuar nga gjykatësi Charles Smith III ka konstatuar se nuk ka prova të mjaftueshme që të mbështesin pretendimin se të akuzuarit mund t’i ikin drejtësisë në rast se lirohen. Megjithatë, sipas Gjykatës, rreziku i pengimit të procedurave dhe i ushtrimit të presioneve ndaj dëshmitarëve mbetet i pranishëm.
“Ekziston rreziku që të akuzuarit të pengojnë përparimin e procedurave dhe të kryejnë krime të tjera kundër atyre që perceptohen si kundërshtarë të UÇK-së, përfshirë dëshmitarët që kanë ofruar prova ose mund të thirren në procese paralele”, thuhet në vendim.
Ndërkohë, më 15 shtator 2025 nisi faza e dëshmive të mbrojtjes. Dëshmitari i parë ishte James Rubin, ish-ndihmës sekretar i shtetit i SHBA-së, i cili dëshmoi për tri ditë radhazi, më 15, 16 dhe 17 shtator. Po ashtu, eksperti amerikan Paul Williams dëshmoi më 17 dhe 18 shtator.
