Një nga momentet më emocionale dhe më të forta të protestës së zhvilluar përpara Kryeministrisë ishte dëshmia publike e një qytetari që tha se prej tre vitesh po përballet me kancerin, i cili ngriti akuza të ashpra ndaj sistemit shëndetësor dhe situatës në spitalin Onkologjik.
Duke marrë fjalën nga podiumi, protestuesi ndau përvojën personale me sëmundjen dhe e përshkroi gjendjen në Onkologjik si një realitet dramatik për pacientët që trajtohen aty.
“Jam një qytetar që vuaj prej 3 vitesh nga kanceri. Do e mund këtë sëmundje. Jo më larg se 3 kilometra nga këtu është një krematorium ku kanë vdekur 20 mijë veta. A është një Aushvic? Është turpi i kësaj godine, i këtij vendi, i 35 viteve. Onkologjiku është vendi ku vdesin e varrosen njerëz përditë. Ky është mesazhi im, o njerëz”, deklaroi ai mes emocionesh.
Fjalimi i tij u prit me duartrokitje dhe reagime të forta nga protestuesit e mbledhur, ndërsa ai vijoi më tej me kritika të drejtpërdrejta ndaj institucioneve shtetërore dhe drejtuesve politikë, të cilët i konsideroi përgjegjës për gjendjen në vend.
Në pjesën e dytë të fjalës së tij, qytetari u bëri thirrje pjesëmarrësve të vazhdojnë mobilizimin dhe angazhimin qytetar, duke argumentuar se protestat duhet të vazhdojnë.
“Mesazhi i dytë, o bij nënash, qofshi jetëgjatë në këtë kauzë. Zoti e do që të mblidhemi çdo ditë më shumë, sepse këtu ka vetëm hajdutëri, vjedhje e poshtërsi. Fajtore për këto është kjo godinë e ndyrë, duhet shembur o njerëz kjo godinë. Edhe dheu poshtë saj duhet të largohet”, tha ai.
