Kreu i PD-së, Sali Berisha, ka reaguar ndaj situatës së zjarreve që kanë përfshirë vendin, duke akuzuar qeverinë për braktisje të qytetarëve dhe mungesë të plotë reagimi. Ai tha se qindra hektarë pyje dhe shtëpi janë djegur, ndërsa njerëzit kanë humbur jetën apo janë plagosur.
Berisha akuzoi qeverinë se në vend të përdorimit të ushtrisë për evakuime, po përdor kamionët për të sekuestruar pajisje të medias, duke iu referuar mbylljes së News24.
Berisha e cilësoi situatën si një emergjencë kombëtare, zona si Delvina, Fushë-Arrëzi dhe Gramshi, ku situata është jashtë kontrollit. Duke renditur një sërë shpenzimesh të qeverisë si 21 milionë euro për udhëtime me çarter, 7 milionë për “Giro d’Italia” dhe 50 milionë euro për tunelin e Llogarasë, kreu i PD akuzoi kryeministrin Rama dhe ministren Balluku për korrupsion. Ai theksoi se me këto fonde, Shqipëria mund të kishte mjete moderne zjarrfikëse dhe një avion “Canadair” për përballimin e emergjencave si kjo.
