Ish-deputeti i Partisë Demokratike, Ervin Salianji, ka reaguar ashpër pas rezultatit të zgjedhjeve të pjesshme lokale të zhvilluara të dielën në pesë bashki të vendit, duke i cilësuar ato si “një ditë e zezë për demokracinë dhe të ardhmen e Shqipërisë”.
Përmes një postimi të gjatë në Facebook, Salianji shprehet se qytetarët nuk besojnë më se vota e tyre mund të sjellë ndryshim, duke fajësuar qeverinë për korrupsion të lartë dhe përqendrim të pushtetit te kryeministri Edi Rama.
“Qytetarët treguan se nuk kanë më besim se me votën e tyre mund të ndryshojnë diçka në qytetet ku jetojnë. Për shkak të korrupsionit të lartë të qeverisë dhe pushtetit të përqendruar në një dorë, asnjë qytetar pa interesa nuk mendoi se qeverisja lokale ka rëndësi për ta”, thekson ai.
Salianji kritikon edhe vetë Partinë Demokratike, e cila zgjodhi të mos garojë me kandidatë politikë në këto zgjedhje, duke pranuar se opozita ka humbur frymën e përballjes me mazhorancën.
“Partia Demokratike ka humbur pasionin dhe zemrën për të luftuar. Ne zgjodhëm rehatinë në vend të përballjes, paqen në vend të betejës”, shkruan ai, duke shprehur zhgënjim për drejtimin politik të opozitës që prej zgjedhjeve të 11 majit.
Ish-deputeti thotë se disfatat e fundit duhet të shërbejnë si alarm për ndryshime brenda partisë, me qëllim rikthimin e besimit te qytetarët.
“Detyra jonë si opozitë është ta ndryshojmë këtë apati që po dëmton të ardhmen e vendit. Shqiptarët na gjykojnë me të drejtë jo vetëm për pafuqinë, por edhe për vendimet e gabuara që e kanë lënë vendin në duart e një autokrati”, shprehet Salianji.
Në përmbyllje, ai bën thirrje për reflektim dhe veprim të menjëhershëm brenda PD-së, duke paralajmëruar se çdo vonesë “është karburant për autokratin”.
