Gjykata Kushtetuese ka vendosur sot të pezullojë dekretin e presidentit Bajram Begaj për shpalljen e zgjedhjeve të pjesshme vendore të 9 nëntorit, pas kërkesës së paraqitur nga ish-kryetari i Bashkisë së Tiranës, Erion Veliaj.
Mbledhja e gjyqtarëve është shoqëruar me debate të ashpra, pasi një pjesë e anëtarëve argumentonin se pezullimi i dekretit është një ndërhyrje e rrallë në kompetencat e presidentit, ndërsa të tjerë kërkonin që të garantohej “moskryerja e një procesi që mund të rezultojë i pavlefshëm”.
Burime nga Gjykata bëjnë me dije se vendimi është marrë me shumicë votash dhe do të qëndrojë në fuqi deri në dhënien e vendimit përfundimtar mbi kërkesën e Veliajt për vlerësimin e ligjshmërisë së shkarkimit të tij si kryetar bashkie.
Seanca për gjykimin në themel është caktuar për 31 tetor, dhe pritet që gjatë saj të diskutohet nëse rregulli i mungesës tre mujore është një shkak kushtetues për shkarkim, apo nëse ai bie ndesh me Kushtetutën.
Po ashtu, pritet të trajtohet edhe çështja më delikate — nëse mungesa tre mujore e Veliajt ka qenë e vullnetshme, apo është shkaktuar nga rrethana jashtë kontrollit të tij. Kujtojmë, për shembull, se për deputetët mungesa prej gjashtë muajsh sjell efekt vetëm nëse është e vullnetshme, dhe jo kur ndodh për shkaqe të jashtme, si në rastin e një mase sigurimi gjyqësor. Një rast i tillë ishte ai i Sali Berishës, për të cilin në atë kohë vetë Kuvendi – në fakt mazhoranca – nuk ndërmori veprime për t’i ndërprerë mandatin.
Këto çështje dhe diskutime të tjera të mundshme mund të bëjnë që vendimi final i Gjykatës Kushtetuese të mos jepet para datës 9 nëntor, ditë kur janë caktuar zgjedhjet e pjesshme.
Si pasojë, në varësi të vendimit përfundimtar të Gjykatës, ose nuk do të zhvillohen zgjedhjet në Bashkinë e Tiranës, ose do të duhet të ricaktohen me një dekret të ri presidencial.
