Gjykata Kushtetuese ka zbardhur vendimin përmes të cilit largoi nga qeveria zëvendëskryeministren Belinda Balluku duke lënë në fuqi masën e pezullimit nga GJKKO.
Edhe pse gjyqtarët u ndanë barazim, për shkak të ligjit, kërkesa e Ramës për ta mbajtur në detyrë zëvendësen e tij, u rrëzua.
VNA, sjell argumentet e gjyqtarëve që mendojnë se pezullimi duhet të lejohet dhe nuk ka nevojë për leje nga Kuvendi.
Në vendimin nr. 8, datë 06.02.2026, Gjykata Kushtetuese ka parashtruar disa argumente kyçe që mbështesin mundësinë e pezullimit të ministrit pa autorizimin e Kuvendit. Këto argumente bazohen në interpretimin e ngushtë të Kushtetutës dhe në natyrën e masës penale.
1. Mbi interpretimin e kufizuar të imunitetit (Neni 73)
Gjykata thekson se imuniteti nuk mund të zgjerohet përtej asaj që shkruhet shprehimisht në Kushtetutë:
• "Imuniteti kushtetues nuk është përjashtim i përgjithshëm nga juridiksioni penal, por mekanizëm i kufizuar ekuilibrues, i konceptuar për raste të caktuara dhe të përcaktuara qartë."
• "Çdo zgjerim i tij përtej rasteve të parashikuara shprehimisht do të cenonte barazinë para ligjit..."
• "Masa e pezullimit nga ushtrimi i detyrës publike [...] ndaj një ministri nuk mund të kërkojë autorizim paraprak të Kuvendit dhe nuk përfshihet në garancitë e imunitetit, pasi: a) nuk përfshihet në listën e masave të nenit 73, pika 2, të Kushtetutës; b) normat për imunitetin interpretohen ngushtë dhe nuk lejojnë zgjerim..."
2. Mbi natyrën e masës: Individi vs. Institucioni
Gjykata argumenton se pezullimi prek personin nën hetim dhe jo funksionimin e shtetit:
• "Masa e sigurimit të ndalimit të ushtrimit të detyrës [...] është e përkohshme dhe i drejtohet individit e jo institucionit, ndaj nuk mund të barazohet me shkarkimin e ministrit (as de facto) dhe as me pezullimin administrativ..."
• "Zbatimi i saj nuk prek në vetvete kompetencat e pushtetit ekzekutiv, ndonëse ndalon përkohësisht individin deri në tre muaj [...] të ushtrojë detyrën e ministrit, me qëllim që të garantohet integriteti i procesit penal."
3. Mbi Ndarjen e Pushteteve dhe kompetencën e Gjykatës
Gjykata mbron pavarësinë e pushtetit gjyqësor për të vepruar në fushën penale:
• "Caktimi i masës së pezullimit nga detyra të ministrit në kuadër të procedimit penal është pjesë e kompetencës së ushtrimit të ndjekjes penale dhe të dhënies së drejtësisë..."
• "Kjo kompetencë përbën objektin qendror të veprimtarisë së tyre dhe asnjë pushtet tjetër nuk mund të ndërhyjë në të."
• "Efektet faktike për ushtrimin e funksionit nuk synojnë institucionin, por individin që dyshohet se nëse vijon kryerjen e detyrës mund të dëmtojë rëndë hetimin penal..."
4. Mbi pretendimin për "Mosmarrëveshje Kompetencash"
Gjykata (përmes mendimit të pakicës) rrëzoi pretendimin e Kryeministrit se kishte një konflikt kushtetues:
• "Kushtetuta nuk i njeh as Kryeministrit dhe as Këshillit të Ministrave kompetencën për pezullimin nga detyra të ministrit."
• "Nuk mund të pranohet se efektet e saj [masës] zvogëlojnë ose ndërhyjnë në kompetencën kushtetuese tëKryeministrit për të propozuar shkarkimin..."
• "Kërkesa, në thelb, nuk synon zgjidhjen e ndonjë mosmarrëveshjeje kompetencash [...] por anulimin e vendimeve individuale gjyqësore..."
