Këshilltarët e Partisë Socialiste kanë dorëzuar këtë të enjte pranë sekretariatit të Këshillit Bashkiak të Tiranës projektvendimin për shkarkimin e kryetarit të bashkisë, Erion Veliaj.
Dokumenti është shoqëruar me një relacion ligjor, ku argumentohet se mungesa e zgjatur e Veliajt nga detyra, prej rreth tre muajsh për shkak të një procesi penal në vijim, përbën bazë ligjore për ndërprerjen e mandatit.
Në relacion theksohet se situata aktuale në kryeqytet kërkon një udhëheqje aktive dhe të pranishme, sidomos në një periudhë zhvillimi të shpejtë ekonomik e social. Megjithatë, sqarohet se kërkesa për shkarkim nuk duhet interpretuar si pranim i akuzave penale ndaj Veliajt.
Nëse projektvendimi miratohet nga Këshilli Bashkiak, kërkesa do t’i kalojë Këshillit të Ministrave, i cili do të marrë vendimin përfundimtar, sipas procedurave ligjore.
