Shkarkimi i Erion Veliajt dhe zgjedhja e zëvëndësit të tij është angazhimi më i madh i Partisë Socialiste e cila nuk ka humbur asnjë ditë kohë që kur mandatoi qeverinë e mandatit të katërt. Kjo vihet re edhe me vendimet që pasuan njëri pas tjetrit nga Këshilli Bashkiak, tek Këshilli i Ministrave ku ky i fundit nuk ka pritur asnjë orë më shumë duke njoftuar në kohë rekord KQZ-n për vakancën e krijuar në Bashkinë e Tiranës.
Në shkresën përkatëse rezulton se ditën e enjte më datë 25 shtator, menjëherë pas vendimit të marrë nga Këshilli i Ministrave, është njoftuar për shkarkimin e Erion Veliajt edhe KQZ.
“Në mbledhjen e Këshillit të Ministrave, datë 25.09.2025, ju bëjmë me dije se është miratuar vendimi nr. 539, datë 25.9.2025, i Këshillit të Ministrave, “Për shkarkimin nga detyra të kryetarit të Bashkisë Tiranë, z. Erion Veliaj”, thuhet në shkresë.
Megjithatë, ish-kryebashkiaku po shfrytëzon cdo hapësirë që i jep ligji dhe këtë të hënë kundërshtoi në Gjykatën Kushtetuese vendimin për shkarkimin e tij nga detyra e kryebashkiakut të Tiranës.
Veliaj pretendon se vendimi është i paligjshëm dhe antikushtetues. Sakaq ankimi i Veliajt pezullon automatikisht firmën e kryeministrit Edi Rama për shkarkimin e tij si dhe bllokon mundësinë e zgjedhjeve të parakohshme për bashkinë e Tiranës deri në momentin kur Kushtetuesja do të njoftojë një vendim për çështjen.
Ndërkohë edhe Gjykata Kushtetuese ka ndjekur rritmin e socialistëve duke zgjedhur menjëherë ditën e sotme gjyqtaren që do të shqyrtoj ankimimin e Veliajt. Sonila Bejtjan do të jetë relatore të kërkesës së bërë nga kryebashkiaku i Tiranës.
