Erion Veliaj vijon sulmet ndaj prokurorit të posaçëm Ols Dado, që e hetoi dhe ngriti 13 akuza penale ndaj tij. Së fundmi, kryebashkiaku nga burgu i Durrësit ka paditur institucionin e Presidentit të Republikës dhe prokurorin Ols Dado. Përmes padisë kërkon shpalljen e pavlefshmërisë absolute të dekretit të emërimit të noterit në prokuror, kur kjo nuk lejohej nga ligji i kohës pa kryer më parë Shkollën e Magjistraturës.
Padia është dorëzuar në Gjykatën Administrative të Shkallës së Parë Tiranë dhe pritet të shqyrtohet në javët në vijim. Që pas arrestimit, Veliaj ka vënë në shënjestër të akuzave dhe sulmeve Dadon dhe tashmë po e ndjek çështjen edhe në rrugë gjyqësore, duke shpresuar të gjejë shkaqe proceduriale për rrëzimin e akuzave.
