Kryetari i Bashkisë së Tiranës, Erion Veliaj, i ka dërguar një kërkesë zyrtare SPAK-ut dhe Drejtorisë së Përgjithshme të Burgjeve, për t’i mundësuar zhvillimin e një takimi me përfaqësuesit e Kongresit të Autoriteteve Lokale dhe Rajonale të Këshillit të Europës, gjatë vizitës së tyre në Tiranë më 17–19 nëntor.
Delegacioni i KiE do të qëndrojë në Shqipëri në kuadër të misionit të monitorimit të standardeve të demokracisë vendore dhe qeverisjes së mirë. Veliaj ka kërkuar që takimi të zhvillohet në ambientet e Burgut të Durrësit, ku ai ndodhet aktualisht, me qëllim informimin e monitoruesve mbi situatën e tij ligjore dhe institucionale.
Në kërkesën e tij, kreu i Bashkisë thekson se takimi synon transparencë dhe komunikim të drejtpërdrejtë, si dhe garantimin e të drejtave të tij si i ndaluar dhe funksionar publik, duke iu referuar neneve 6 dhe 8 të Konventës Europiane për të Drejtat e Njeriut, që lidhen me të drejtën e komunikimit dhe përfaqësimit. Ende nuk ka një vendim zyrtar nga autoritetet lidhur me miratimin e kësaj kërkese.
