Erion Veliaj duket se është kryetar bashkie vetëm në letër, ndërsa në praktikë rolin e kryebashkiakes po e ushtron Ogerta Manastirliu. Procesi i miratimit të buxhetit të Bashkisë së Tiranës për vitin 2026 duket se po e nxjerr në pah këtë paradoks brenda socialistëve.
Burime për mediat bëjnë me dije se sot, në orën 18:00, Ogerta Manastirliu do të mbledhë këshilltarët e majtë në selinë e Partisë Socialiste, pikërisht për të diskutuar mbi buxhetin që pritet të votohet ditën e enjte. Kjo mbledhje vjen në një kohë kur kryebashkiaku Erion Veliaj, i cili ndodhet në qeli, u ka dërguar një letër këshilltarëve bashkiakë, ku kërkon që mendimi i tij të merret në konsideratë për buxhetin, përndryshe procesi do të binte ndesh me parimet ligjore.
Këto lëvizje tregojnë se, pavarësisht vendimit të Gjykatës Kushtetuese, socialistët duket që preferojnë si kryebashkiake Ogerta Manastirliun dhe jo Erion Veliajn. Ndonëse deputetja e PS ka qenë vetëm kandidate për kryebashkiake, pasi zgjedhjet u anuluan dhe nuk u zhvilluan, ajo në muajt e fundit ka drejtuar takimet e zhvilluara në Tiranë lidhur me buxhetin.
Manastirliu u shpall kandidate e PS për zgjedhjet në Bashkinë e Tiranës, pasi Këshilli Bashkiak propozoi shkarkimin e kryetarit Erion Veliaj. Megjithatë, edhe pse ky propozim u miratua nga Këshilli i Ministrave, Gjykata Kushtetuese e riktheu Veliajn në detyrë, duke shfuqizuar zhvillimin e zgjedhjeve të parakohshme në kryeqytet.
Por duket se ky vendim nuk e ka penguar Manastirliun të shfaqet publikisht në rolin e kryebashkiakes dhe jo si deputete e zgjedhur. Ndërkohë, Veliaj nga ana tjetër duket qartazi i përjashtuar nga strukturat e PS, të cilat, sipas zhvillimeve të fundit, nuk e pyesin për vendimmarrjet, pavarësisht se ai vijon të jetë formalisht kryetar i bashkisë së Tiranës.
