Gjykata Kushtetuese ka njoftuar zhvillimin e seancës plenare publike për shqyrtimin e kërkesës së ish-kryebashkiakut të Tiranës, Erion Veliaj, në datën 31 tetor 2025. Në këtë seancë pritet të jetë i pranishëm edhe vetë Veliaj, i cili aktualisht ndodhet në paraburgim.
Sipas njoftimit zyrtar të bërë publik nga Gjykata, ftesa për seancën i është dërguar palëve më 9 tetor 2025, ndërsa më 13 tetor institucioni ka njoftuar Drejtorinë e Përgjithshme të Burgjeve për marrjen e masave të nevojshme që garantojnë pjesëmarrjen e tij.
Vendimi për ta lejuar Veliajn të marrë pjesë personalisht në këtë seancë konsiderohet një zhvillim me peshë, pasi për herë të parë pas ndalimit të tij, ai do të dalë publikisht përpara trupës së Gjykatës Kushtetuese.
Gjykata Kushtetuese, bazuar në nenet 21, pika 1 dhe 38, pikat 1 dhe 2 të ligjit nr. 8577, të ndryshuar, me shkresën nr. 28 (E) 2025 Regj.Them, datë 09.10.2025, ka njoftuar kërkuesin Erion Veliaj për datën dhe orën e zhvillimit të seancës plenare publike në 31.10.2025.
Gjithashtu, ju informojmë se Gjykata Kushtetuese me shkresën nr. 28 (E) 2025 Regj.Them, datë 13.10.2025, ka njoftuar Drejtorinë e Përgjithshme të Burgjeve duke e vënë në dijeni për datën dhe orën e zhvillimit të seancës plenare publike, si dhe marrjen e masave për shoqërimin e zotit Erion Veliaj në seancën plenare publike në rast se do të shprehej vullneti për marrjen pjesë personalisht në gjykim.
Në vijim, në datën 20.10.2025, pas shprehjes së vullnetit të kërkuesit, Gjykata ka njoftuar edhe Prokurorinë e Posaçme kundër Korrupsionit dhe Krimit të Organizuar në lidhje me sa më sipër.
