Erion Veliaj ka vendosur të vërë në lëvizje Gjykatën e Posaçme ku ka ankimuar një shkresë të SPAK që refuzoi kërkesën e tij për takim me 4 avokatët e huaj. Kryebashkiaku ka pajtuar dy studio avokatie, një amerikane dhe një britanike dhe bëri shkresë për leje për tu takuar me Ben Brandon, Daniel Fetterman, Joshua Roberts e Celia Marr me argumentin se do të përgatisin dosjen për të Gjykatën e Strasburgut.
Prokuroria e Posaçme e rrëzoi kërkesën e tij me arsyetimin se Veliaj mbrojet nga dy avokatë shqiptarë dhe në këtë mënyrë i garantohet e drejta e mbrojtjes. Avokatët e huaj sipas SPAK nuk kanë tagër për ta përfaqësuar pasi nuk janë regjistruar pranë një studio avokatie në Shqipëri dhe nuk janë nga studio ligjore në vendet e BE-së sikurse e parashikon ligji.
Veliaj këmbëngul të takohet me ta, pasi thotë se duhet të përgatisin dosjen për në Strasburg, ndaj i kërkon gjykatës të shfuqizojë vendimin e SPAK dhe të realizohen takimet.
Kryebashkiaku i Tiranës ndodhet në paraburgim që prej 10 shkurtit 2025. Ai është marrë i pandehur për 5 akuza bashkë me ish-bashkëshorten dhe 28 persona të tjerë, fizik e juridik.
