Ish-kryebashkiaku i Tiranës, Erion Veliaj, ka hedhur akuza të forta ndaj Prokurorisë së Posaçme gjatë fjalës së tij në Gjykatën Kushtetuese, ku po shqyrtohet kërkesa e tij për shpalljen antikushtetuese të shkarkimit nga detyra.
“Po t’ju thoja që shumica e kryetarëve të bashkive janë në presion konstant për të futur të afërmit e prokurorëve të posaçëm në punë. Kjo ndodh edhe në Bashkinë e Tiranës. Nëse nuk fut fisin e prokurorëve të posaçëm në punë, atëherë ai thotë: ‘Ia tregoj unë atij’”, deklaroi Veliaj, duke insinuar se prokurorë të SPAK-ut kanë ushtruar presion ndaj drejtuesve vendorë.
Veliaj krahasoi situatën me botën e egër, duke thënë se “edhe natyra ka kodet e saj”, ndërsa akuzoi Prokurorinë e Posaçme për “sjellje monopoliste” që, sipas tij, synon të “shkatërrojë jetën e dikujt edhe pa vendim gjykate”.
Ai shtoi se nëse do të ishte dëgjuar nga Këshilli i Ministrave para vendimit për shkarkimin, situata do të ishte ndryshe.
“A do të kishte ndryshuar ndonjë gjë po të ftohesha në Këshillin e ministrave? Nuk e di. Por kur dëgjon, ndryshon diçka. Ndoshta nuk do të ishit kaq të nxituar të vepronit kështu”, tha Veliaj.
Sipas tij, ekzekutivi duhet të kishte reflektuar:
“Nëse do t’ju thosha që jam këtu prej një njeriu që nuk ekziston, Këshilli i Ministrave do të thoshte që kjo është një iniciativë e jashtëzakonshme për të nisur një proces drejtësie për të mbrojtur kryetarët e bashkive.”
Veliaj akuzohet nga SPAK për një sërë veprash penale, ndërsa vijon të kundërshtojë shkarkimin e tij dhe proceset gjyqësore ndaj tij.
