Ministri i Drejtësisë, Ulsi Manja, organizoi sot një tryezë diskutimi për draftin e ri penal. Por, përveç hartuesit të draftit, Arben Rakipit dhe disa ekspertëve të tjerë, në tryezë munguan përfaqësues të SPAK-ut dhe të institucioneve të tjera të drejtësisë.
Manja e justifikoi mungesën e tyre duke thënë se janë në “konflikt interesi”. Ky arsyetim ngre pikëpyetje nëse ministri nuk e kupton nocionin e konfliktit të interesit, apo nëse qëllimi i qeverisë është të mbajë larg përfaqësuesit e drejtësisë që shpesh nuk përputhen me interesat e saj.
Në fakt, ndryshimet në Kodin Penal lidhen drejtpërdrejt me punën e institucioneve të drejtësisë, të cilat do të duhet t’i zbatojnë çdo ditë. Kush më mirë se ata e di se ku çalon kodi aktual dhe ku duhet përmirësuar?
Pavarësisht kësaj, ministri tha se ka kërkuar mendim nga ekspertë italianë, ndërsa vendasi që njohin më mirë terrenin janë lënë jashtë.
“Drafti i është dërguar edhe disa ekspertëve italianë. Në mes të shtatorit dhe deri në fund të vitit ky draft do t’i nënshtrohet një konsultimi të gjerë publik, me 25 tryeza konsultimi, duke përfshirë edhe aspekte të veçanta të Kodit Penal,” deklaroi Manja.
Mesa duket, kritikat e institucioneve shqiptare të drejtësisë për projektin nuk janë pritur mirë as nga ministri dhe as nga shefi i tij. Zgjidhja e gjetur duket të jetë përjashtimi i atyre që do të zbatojnë ligjin në praktikë, në mënyrë që drafti të kalojë pa pengesa, pavarësisht se disa dispozita të tij janë konsideruar absurde.
