Presidenti amerikan Donald Trump ka publikuar në rrjetin social Truth Social të dhëna zyrtare mbi përfitimin e ndihmës sociale nga familjet emigrante në Shtetet e Bashkuara, ku thuhet se 41.3% e familjeve shqiptare që jetojnë në SHBA marrin asistencë sociale nga shteti amerikan.
Sipas listës së shpërndarë nga Trump, të dhënat përfshijnë familje emigrante nga vende të ndryshme dhe nivelin e përfitimit të ndihmës sociale për secilin shtet origjine. Në këtë renditje, Shqipëria rezulton me një përqindje mbi pragun 40%, ndërsa Kosova shënohet me një nivel edhe më të lartë, rreth 46% të familjeve përfituese.
Tabelat janë pjesë e një renditjeje të titulluar “Immigrant Welfare Recipient Rates by Country of Origin”, e cila paraqet përqindjen e familjeve emigrante që marrin asistencë sociale, të ndara sipas vendit të origjinës. Sipas këtyre të dhënave, Shqipëria renditet pranë vendeve si Moldavia, Ukraina dhe Vietnami, me një përqindje më të ulët se disa shtete të tjera, por gjithsesi të konsiderueshme.
